"Laugavegurinn"
Síðast í júlí 1992 fórum við, þrenn
hjón og tveir táningar, saman í hópi og gengum
"Laugaveginn", þ.e. frá Landmannalaugum til Þórsmerkur,
ca. 5o km langa gönguleið, eftir vel merktum stíg.
Þetta er alveg ekta bakpokaferð, þar sem maður verður
að bera sjálfur allan búnað, þ.e. tjald, mat,
fatnað og annan búnað, bæði þarfan og óþarfan.
Fyrir fjögurra daga ferð, eins og þessa, þá er
ágætt fyrir tvo að skipta sameiginlegum búnaði
á milli sín, t.d. annar tekur tjaldið og hinn eldunaráhöld
og jafnvel mat beggja, eftir því, hvað tjaldið verður
regnblautt á leiðinni !
Fyrsti áfanginn var frá Landmannalaugum að Hrafntinnuskeri
(ca. 10km). Annar áfangi var til Álftavatns (ca. 10km). Þriðji
áfangi var til Emstrubotna (ca. 15km). Og fjórði áfangi
síðan til Þórsmerkur (ca. 15km).
Þetta er fremur auðveld ganga og flestum fær, en óvanir
þurfa að fara nokkrar 3-4 klst. æfingaferðir með fullar
klyfjar (hámark 15-20 kg, helst 11-16 kg) á bakinu, áður
en lagt er af stað. Það fer þetta enginn beint upp úr
sófanum í stofunni heima, það bitnar ekki síst
á ferðafélögunum, ef slíkir bjartsýnisfuglar
ætla að fara að flögra af stað og næsta víst
að fjögurra daga áætlunin lengist talsvert.